نہیں میرا کوئی حامی خداوندا سوا تیرے

نہیں میرا کوئی حامی خداوندا سوا تیرے

سناؤں کس کو میں حال پراگندہ سوا تیرے

پھنسا ہے مرغ دل بے طرح میرا بند عصیاں میں

چھڑا دے کون کس سے یہ کھلے پھندا سوا تیرے

زمیں کیا آسماں کیا کوہ کیا گلزار و صحرا کیا

سبھی ہو جائیں گے اک دن پراگندہ سوا تیرے

نگین دل سے مٹ جائے نشان عالم فانی

کسی شے کا نہ نقش اس میں رہے کندہ سوا تیرے

نہ ہو مطلب کسی سے یاد تیری میری ہمدم ہو

نہ کوئی کام ہو مجھ کو نہ کچھ دھندا سوا تیرے

گناہ جتنے ہی ہوں لیکن بتا سکتا ہوں ہاں اتنا

کرم ہیں میرے جرموں سے خداوندا سوا تیرے

حسنؔ اوپر ترے فریاد لایا نفس سرکشی کی

مدد چاہے بھلا کس سے ترا بندہ سوا تیرے