اللہ رے مراتب و توقیرِ فاطمہ

اللہ رے مراتب و توقیرِ فاطمہ

آٹھویں بہشت ہوگئی جاگیرِ فاطمہ

توقیر مصطفیٰ کی ہے توقیرِ فاطمہ

تحقیر ہے رسول کی تحقیرِ فاطمہ

جھوٹا کیا جو دعویٰ جاگیرِ فاطمہ

کیا قولِ حق نہ تھا پئے تطہیرِ فاطمہ

اٹھتا تھا باپ بیٹی کی تعظیم کے لیے

پوچھو رسول پاک سے توقیرِ فاطمہ

رونق دو چند ہوگئی کرسی و عرش کی

ظاہر ہوئی ازل میں جو تنویر فاطمہ

بابا رسول شوہر و فرزند امامِ خلق

ہے کون ہم مراتب و توقیرِ فاطمہ

پردہ ازل میں چشم ملائک سے بھی رہا

رکھی گئی حجاب میں تصویرِ فاطمہ

عرشِ خدا پہ عقد ہوا پیشِ انبیا

اللہ ری بلندیٔ تقدیرِ فاطمہ

پُر ضو ہیں اس کے نورِ ہدایت سے دو جہاں

بہتر ہے نورِ مہر سے تنویرِ فاطمہ

حیدر کا گھر جو منزلِ نجمِ فلک بنا

منظور تھی خدا کو یہ توقیر فاطمہ

محشر میں نجمؔ رجسِ معاصی سے کیا خطر

ہم ہوں گے زیر چادرِ تطہیر فاطمہ