مری قسمت پہ خود میرا مقدر آج نازاں ہے

مری قسمت پہ خود میرا مقدر آج نازاں ہے

کہ موضوعِ سخن میرا ثنائے شاہِ مرداں ہے

ہر اک ذرہ چمن کا نور برکف گل بداماں ہے

کہ اب وقتِ طلوعِ آفتابِ صبحِ عرفاں ہے

تلا ہے آج یوں جو بن لٹانے پر چمن اپنا

کہ از خود جس سے شرمندہ حجابِ نو عروساں ہے

چمن میں چار جانب وصل کے آثار ہیں پیدا

ہر اک گل کی جبیں پر قطرۂ شبنم نمایاں ہے

ارے توبہ قبائے تنگ میں غنچوں کا یوں تننا

بایں انداز ارزاں دعوتِ حسنِ فروزاں ہے

الٰہی خیر سوسن کی زباں مانوسِ لکنت ہے

تقاضائے مسلسل دیدۂ نرگس میں پنہاں ہے

نِرت کرتی ہیں شاخیں اور پتے تال دیتے ہیں

بہ اظہارِ کمالِ حسن و فن شمشاد رقصاں ہے

یہ آخر ماجرا کیا ہے سمجھ میں کچھ نہیں آتا

فلک ہے محوِ گردش اور زمیں حیرت بداماں ہے

معاً برجِ حمل سے آفتابِ دو جہاں چمکا

کوئی سمجھا زمیں پر چاند، کوئی مہرِ تاباں ہے

حیا چونکی، مروت کسمسائی، رحم جاگ اٹھا

اخوت کا گلِ تر آج مہمانِ غریباں ہے

تبسم کی لہر آئی رخِ محبوبِ داور پر

اسی دن سے زمانہ روشناسِ صبحِ ایماں ہے

کسی کی زلف کی تشریح کو لیلائے شب آئی

کسی رخسار کی تفسیر کو موجود قرآں ہے

بہ میدانِ سخاوت رحم فرماؤ کرم گستر

بہ میدانِ شجاعت نامِ نامی شیرِ یزداں ہے

بھلا میں نام کیوں لوں عرش ہو یا حوضِ کوثر ہو

کہیں پر رت جگا ہے اور کسی جا پر چراغاں ہے

فلک سے آرہی ہیں چوڑیاں بجنے کی آوازیں

بصد حسرت نگاہِ چرخ سوئے خاک ساراں ہے

صفِ عشاق میں ہر ایک جانب نفسا نفسی ہے

ہیں پراونے ہزاروں اور اک شمعِ فروزاں ہے

کوئی گرویدۂ عارض تکے جاتا ہے چہرے کو

کوئی وابستۂ گیسوئے عنبر عطر افشاں ہے

مناسب ہے یہی موقع دعائے خیر کا اے دل

کہ وا بابِ اجابت با طفیلِ شاہِ مرداں ہے

نصیرؔ ان کے کرم سے بندۂ شبیر کہلائے

یہی اک آرزو، یہ ہی تمنا، یہ ہی ارماں ہے