روئے محمدِ صبحِ بہاراں، مطلعِ عرفاں، مرجعِ ایماں، آیۂ قرآں، تصدیقِ یزداں

روئے محمدِ صبحِ بہاراں، مطلعِ عرفاں، مرجعِ ایماں، آیۂ قرآں، تصدیقِ یزداں

زلفِ معنبر شامِ گلستاں، مونسِ ہجراں، یاورِ حرماں، درد کا درماں، زیست کا ساماں

جانِ شریعت، روحِ طریقت، حاملِ رحمت، عینِ حقیقت، وجہِ ارادت، رافع حاجت

شمعِ ہدایت، مشعلِ جودت، بحرِ محبت، کانِ مروت، حاصلِ الفت، وہ جانِ جاناں

آپ ہی رہرو، آپ ہی منزل، آپ تلاطم، آپ ہی ساحل، صورتِ بندہ ذات میں شامل

حسنِ مکمل، عشق کا حاصل، آپ ہی بسمل، آپ ہی قاتل، یعنی مرا دل، وہ شہِ خوباں

آئیں بہاریں، برسیں گھٹائیں، رس کی پھواریں، رنگ جمائیں، عقل کے مارے ہوش گنوائیں

کوئلیں بہکیں، بلبلیں چہکیں، قمریاں بہکیں، ملہار گائیں، طرفِ چمن وہ گرہوں خراماں

آپ ہی اول، آپ ہی آخر، آپ ہی باطن، آپ ہی ظاہر، گاہ مسلماں، گہ بتِ کافر

آپ نظارہ، آپ ہی ناظر، آپ نصیرؔ اور آپ ہی ناصر، آپ ہی ہر صورت میں نمایاں