بنائے کن فکاں نورِ خدا کی بات کرتے ہیں

بنائے کن فکاں نورِ خدا کی بات کرتے ہیں

ادب کے ساتھ ختم الانبیا کی بات کرتے ہیں

سلامی دیتی ہیں پلکیں نگاہیں جھوم جاتی ہیں

خوشی میں جب حبیبِ کبریا کی بات کرتے ہیں

غرض تسنیم و کوثر سے نہ ہم کو کام جنت سے

کہ ہم دل سے محمد مصطفیٰ کی بات کرتے ہیں

مٹائیں ظلمتیں جس نے دکھائی راہِ حق جس نے

ہم اس نورِ خدا اس رہنما کی بات کرتے ہیں

نہ کیوں حسنِ سخن پر ہوں ہماری رحمتیں صدقے

زباں کوثر سے دھو کر مصطفیٰ کی بات کرتے ہیں

ہمیں دوزخ کی کیا پرواہ ہمیں کیوں ڈر ہو محشر کا

ہم عاصی شافعِ روزِ جزا کی بات کرتے ہیں

سلام اس ذاتِ عالی پر درود اس نورِ اقدس پر

پڑھو صلِ علیٰ ہم مصطفیٰ کی بات کرتے ہیں

یہ ہیں جن و بشر کیا شے خدا کے ہم زباں ہو کر

فرشتے بھی درِ خیرالوریٰ کی بات کرتے ہیں