لہرا کے گھٹا آئی گل بادہ بہ جام آئے

لہرا کے گھٹا آئی گل بادہ بہ جام آئے

کوثر کی فضاؤں سے ساقی کا پیام آئے

اشعار لکھوں ایسے میں مدحِ محمد میں

قرطاس پہ خامے کو اندازِ خرام آئے

یہ حکمِ مشیت ہے صف بستہ رہیں قدسی

جب بزم میں تاروں کی وہ ماہِ تمام آئے

وہ بت کدۂ آذر بن جائے نہ کیوں کعبہ

جس دل میں محبت ہو جو دل ترے کام آئے

افلاک کی راہوں سے گزرے ہیں محمد جب

خاموش فضاؤں سے تاروں کے سلام آئے

دل نذر کروں میں بھی ایمانِ محبت میں

مجھ کو بھی تمنا ہے جلوہ گہہِ عام آئے

دیباچۂ ہستی میں عنواں ہو نظرؔ یہ بھی

اس نعتِ محمد میں میرا کہیں نام آئے