اے بادِ صبا ان کے روضے کی ہوا لے آ
اے بادِ صبا ان کے روضے کی ہوا لے آ
ہم ہجر کے ماروں کو طیبہ سے دوا لے آ
تن من کو ہمارے جو ایماں کی جلا بخشے
سرکار کی نگری سے وہ خاکِ شفا لے آ
صدیق سے سچائی فاروق سے بے باکی
عثمان سے فیاضی حیدر سے ولا لے آ
ایثار حسن سے اور شبیر سے قربانی
اجمیر کے خواجہ سے وہ خوفِ خدا لے آ
میں عشقِ شہِ دیں میں ہو جاؤں فنا اک دن
ہر سو مری شہرت ہو کچھ ایسی کلا لے آ
حسنین و علی زہرا کا سایہ رہے مجھ پر
نورانی گھرانے کی نورانی ضیا لے آ
ہوں غرق گناہوں میں اعمال ہیں بد میرے
آقا سے شفاعت کا فرمان ذرا لے آ
آقا کے غلاموں کے دل جن سے چمک اٹھیں
کرنیں ہرے گنبد کی اے بادِ صبا لے آ
دنیا مری بن جائے عقبیٰ بھی سنور جائے
آمین کہیں قدسی وہ حرفِ دعا لے آ
نعتِ شہِ طیبہ ہے پیشہ میرا آبائی
نظمیؔ کی کمائی میں برکت کی دعا لے آ
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
