فخرِ دو عالم نورِ مجسم رحمت سے بھرپور

فخرِ دو عالم نورِ مجسم رحمت سے بھرپور

رب نے انہیں بخشے ہیں خزانے نعمت سے بھرپور

صلی اللہ علیہ وسلم ورد رہے ہر سانس

من ہو ہمارا ہر دم اچھی عادت سے بھرپور

انا اعطینک الکوثر قرآں کا اعلان

میرے نبی اوصاف میں یکتا کثرت سے بھرپور

ثم دنا فتدلیٰ کا منصب کس کو حاصل

ہاں اک میرے آقا ہی ہیں رفعت سے بھرپور

حضرتِ جابر کے گھر کی دعوت کی تھی کیا شان

ریزہ ریزہ مالکِ کل کی برکت سے بھرپور

میں نے درِ کعبہ سے لپٹ کر مانگی ایک دعا

یا رب رکھنا عشقِ نبی کی لذت سے بھرپور

شہرِ مدینہ میں ترے صدقے میں تیرے قربان

تیری زمیں کا ذرہ ذرہ طلعت سے بھرپور

مکہ کی گلیاں جس کی مہک سے مہکیں صبح و شام

وہ ہے پسینہ میرے نبی کا نکہت سے بھرپور

مسجدِ نبوی گنبدِ خضریٰ روضۂ پاک حضور

رشکِ ارم ہے اور بہارِ جنت سے بھرپور

آقا سورج تارے صحابہ کہکشاں آلِ نبی

ہر اک اپنی اپنی جگہ ہے عظمت سے بھرپور

یاں بھی ہیں جلتے واں بھی جلیں گے آقا کے دشمن

نامۂ اعمال ان کا رہے گا لعنت سے بھرپور

محشر میں نظمیؔ کو بچانے آئیں گے نانا جان

میرے سر پر ہاتھ رکھیں گے شفقت سے بھرپور