قاصد حضورِ یار میں جب ماجرا کہو

قاصد حضورِ یار میں جب ماجرا کہو

ان کی جناب میں مرا شوق لقا کہو

قاصد خدا کے واسطے جا کر بہت بہت

اس یار خوش ادا کو ہماری دعا کہو

قاصد ذرا شتاب مری داستان غم

اس یار غمزدہ سے برائے خدا کہو

صل علی النبی کما ینبغی علیہ

کہ کر حضور جان سے پھر مرحبا کہو

اے کاروان عشق مدینہ کی راہ میں

ہر ہر قدم میں مری بھی ٹک التجا کہو

اس نعمتیؔ شکستہ کے جانب سے زائراں

صلوا علی النبی کہو پھر مرحبا کہو