کونین سے بہتر ہے کہیں شان مدینہ

کونین سے بہتر ہے کہیں شان مدینہ

ہے عرش سے تا فرش بدن جان مدینہ

تشریف قدوم مہِ تابانِ عرب سے

ہے رشکِ جناں آج تو سامان مدینہ

عالم میں کہاں ایسا کوئی باغ و گلستاں

اک بقعۂ جنت ہے یہ بستان مدینہ

نسبت ہی نہیں مشک کو نہ خطا کو

یہ رشک جناں اور ہے ریحان مدینہ

مدت سے یہی دل کو طمع ہے کہ ہو قسمت

یک ریزہ ازاں خوان پر الوان مدینہ

انواع تحیات بر آں شہر خصوصاً

وہ روضہ جہاں آپ ہیں سلطان مدینہ

صلوات و سلام از جگر سوختہ بادا

ہر آن نثارِ مہِ تابان مدینہ

ہے دل کی تمنا یہ الٰہی ہو میسر

دیدار رخ ماہ درخشان مدینہ

اس نعمتیؔ مشتاق کی تا خاتم مرسل

پہنچاؤ ذرا عرض کو دربان مدینہ