بنیاد خلق جان جہاں جان جملہ جاں

بنیاد خلق جان جہاں جان جملہ جاں

مجموعۂ صفات خدا بندۂ الۂ

ختم الرسل امام رسل رہنمائے خلق

عالی مقام شمس رسالت رفیع جاہ

بالائے قدسے خلعت پیمبری کو زیب

عظمت سے سر کے تاج نبوت سر کلاہ

عاشق نواز و بندہ نواز و گدا نواز

داروئے درد مند و شفا بخش و خیر خواہ

کب حسن مصطفیٰ سے ہے یوسف کو ہمسری

شرمندہ جن کے آگے سر چاردہ کا ماہ

زمرہ سے عاشقوں کے اگرچہ نہیں ہیں ہم

خالی بھی دل نہیں ہے محبت سے ان کے گاہ

امید لطف ختم رسالت سے ہے ہمیں

رحمت کی ہو نگاہ اس عاصی پہ گاہ گاہ

پائین بزم گاہ تلک اپنے بار دیں

گلشن کے آس پاس رہے جس طرح گیاہ

کیوں نعمتیؔ گناہ سے ہوتا ہے تنگ دل

کر لیں گے خود رسول تری مغفرت کی راہ