تھے اہلِ عرب شکلِ مردہ، دم تھا نہ ذرا بیچاروں میں

تھے اہلِ عرب شکلِ مردہ، دم تھا نہ ذرا بیچاروں میں

وہ فخرِ مسیحا کیا آئے جان آگئی غم کے ماروں میں

سب قحط جہاں سے دور ہوا مینہ رحمت باری کا برسا

جنگل میں ہوا منگل ہر جا مہکا گل وحدت خاروں میں

اس نور سے دل معمور ہوا ہر خانہ تجلّی طور ہوا

جو بغض حسد تھا دور ہوا سب ہو گئے حق کے پیاروں میں

سیفی تھی زبانِ شاہِ اُمم سر ہوگیا ہر خود سر کا قلم

شاہوں نے رکھے سر زیرقدم جوہر نہ رہے تلواروں میں

جوعبد تھے لات وعزیٰ کے بندہِ خاصِ خدا ٹھہرے

توحید کے سکّے دل پہ جمے کہلانے لگے ابراروں میں

صحرائے مدینہ کا منظر جنّت کے ہے باغوں سے خوشتر

فرحت یہ نثارِ خستہ جگر رضواں کے کہاں گلزاروں میں