بنا دے اپنے کعبہ کا مجھے زوّار یا اللہ

بنا دے اپنے کعبہ کا مجھے زوّار یا اللہ

دکھا دے روضۂ شاہِ رسل یک بار یا اللہ

تو ہی ہے شافع دردِ دل بیمار یا اللہ

نہیں تیرے سوا کوئی مرا غمخوار یا اللہ

جو کچھ چاہا کیا تونے جو کچھ چاہا وہ کرتا ہے

میں ہوں محتاج مستغنی تری سرکار یا اللہ

تو ستاری تو غفاری تو قہاری تو جباری

میں ہوں اک بندۂ مجبور تو مختار یا اللہ

شرابِ عشق کا ساغر پلا دے اے مرے داور

مئے توحید سے کردے مجھے سرشار یا اللہ

ترا اسمِ مقدس ہے مری رگ رگ میں پیوستہ

بر آمد ہو مری ہر سانس سے ہر بار یا اللہ

نہیں پروا کہ سر جائے بلا سے کام آجائے

نہ من موڑوں گا تیری راہ سے زنہار یا اللہ

سنا جب ثم وجہ اللہ تو ثابت ہو گیا ہم کو

تجھی کو پوجتے ہیں کافر و دیندار یا اللہ

فرشتے جس مزارِ پاک پر ہر بار صدقے ہوں

دکھا دے زندگی میں مجھ کو وہ اک بار یا اللہ

تصدق احمدِ مرسل کا اور ان کے نواسوں کا

دکھا دینا قیامت میں مجھے دیدار یا اللہ

نہ کیجو اپنی رحمت سے گناہوں پر نظر میرے

ترا بندہ یہ کمتر ہے نثارِؔ زار یا اللہ