سرکار کا ہوں میں بھی ثنا خواں زہے نصیب

سرکار کا ہوں میں بھی ثنا خواں زہے نصیب

حاصل ہے مجھ کو گوہرِ ایماں زہے نصیب

سرکارِ کائنات کی یادوں کا قافلہ

امروز میرے گھر میں ہے مہماں زہے نصیب

مجھ کو غلام کہہ دیا اپنا حضور نے

آخر ہوا نجات کا ساماں زہے نصیب

نعتِ رسولِ پاک کی خوشبو نے آج پھر

چھیڑا ہے میرا سازِ رگِ جاں زہے نصیب

گلزارِ مصطفیٰ کا ہے مسکن اسی لیے

ہے فکر میری خلد بداماں زہے نصیب

مدت سے میرے طاقِ دل و جاں میں ہے مقیم

عشقِ نبی کی شمعِ فروزاں زہے نصیب

ہم ہیں گدائے کوچۂ سلطانِ دو جہاں

ہے ٹھوکروں میں سطوتِ شاہاں زہے نصیب

سنگِ درِ رسول پہ دل ہے پڑا ہوا

دنیا ہے آج مجھ سے گریزاں زہے نصیب

ان کے کرم کے پھول کھولے ہیں روش روش

روشن ہے میرے دل کا گلستاں زہے نصیب

شاخِ کرم ہوا نے ہلائی تو یہ ہوا

دامن میں آگیا گلِ خنداں زہے نصیب

مجھ پر ہے مہرباں، مری جانب ہے ملتفت

اے نورؔ! مدحِ شاہِ رسولاں، زہے نصیب