کسی نے مجھ سے جو پوچھا ہیں کیا علی والے

کسی نے مجھ سے جو پوچھا ہیں کیا علی والے

کہا یہ میں نے ہیں سب سے جدا علی والے

دکھائی دیتا ہے جس میں نبی کا عکسِ جمیل

قسم خدا کی ہیں وہ آئینہ علی والے

نبی کے دین پہ جانیں نثار کرتے ہیں

حسن حسین علی فاطمہ علی والے

ادب ہے شرط قدم چوم اور بچھا آنکھیں

وہ دیکھ آگئے بادِ صبا علی والے

نبی کا ساتھ نہ چھوڑیں گے آخری دم تک

خدا گواہ کہ ہیں باوفا علی والے

فرازِ عزم نے چومے نقوشِ پائے ثبات

پہنچ گئے جو سر کربلا علی والے

جو چاہیے کہو ان سے، تم التجا تو کرو!

دعا کریں گے برائے شفا علی والے

جو ایک ذرہ برابر بھی رکھے عشقِ علی

اسے بھی خلد کریں گے عطا علی والے

ہمیشہ کرتے رہیں دائرانِ حرفِ نمود

ندی میں پھینکیں جو سنگِ نوا علی والے

قسم خدا کی ہے پورا یقیں مجھے اس پر

کہ بخشوائیں گے میری خطا علی والے

مرا یہ رشتہ علی والوں سے قدیمی ہے

میں طاق ہوں تو چراغِ ضیا علی والے

جہاں پکارا کسی تشنہ لب نے دیکھو ادھر

برس گئے وہاں بن کر گھٹا علی والے

خدا ہی جانتا ہے نورؔ مرتبہ ان کا

ہر ایک سوچ سے ہیں ماورا علی والے