ابھی تک قلبِ افسردہ جواں معلوم ہوتا ہے

ابھی تک قلبِ افسردہ جواں معلوم ہوتا ہے

یہ در پردہ کوئی روحِ رواں معلوم ہوتا ہے

جسے دیکھو، وہی ایذار ساں معلوم ہوتا ہے

زمیں کا ذرہ ذرہ آسماں معلوم ہوتا ہے

کچھ اس اسلوب سے آغاز کی ہے داستاں میں نے

کہ ہر فقرہ مکمل داستاں معلوم ہوتا ہے

بدل ڈالا ہے ماحولِ قفس اتنا اسیروں نے

کہ بادی النظر میں آشیاں معلوم ہوتا ہے

سحر سے شام تک سجدے ہیں اور سجدے بھی بے گنتی

سرِ شوریدہ جز و ِآستاں معلوم ہوتا ہے

بباطن تو ہی تو ہر انجمن میں جلوہ آرا ہے

بظاہر تیرا ہر جلوہ نہاں معلوم ہوتا ہے

نگاہیں روضۂ خسرو ؔپہ قیصرؔ کانپ جاتی ہیں

کہ زندہ موجدِ اردو زباں معلوم ہوتا ہے