امتحانِ بشر تجھ کو مقصود ہے کیسے کہہ دوں میں آسودگی چاہیے

امتحانِ بشر تجھ کو مقصود ہے کیسے کہہ دوں میں آسودگی چاہیے

میرے معبود تیری خوشی میں ہوں خوش مجھ کو ہر وقت تیری خوشی چاہیے

محو تیرے تصور میں ہر دم رہوں یعنی رشکِ خودی بے خودی چاہیے

بندہ پرور یہی ہے عقیدہ میرا چاہیے چاہیے لازمی چاہیے

زندگی کے لیے بندگی چاہیے بندگی کے لیے زندگی چاہیے

لفظ کن سے دو عالم کو پیدا کیا وہ فلک بن گیا بن گئی یہ زمیں

وجہ تخلیق آدم پہ اہلِ فلک جس گھڑی بے تحاشہ ہوئے نکتہ چیں

فیصلہ تو نے اپنا یہ صادر کیا میں خلیفہ بناؤں گا اب بالیقیں

تم سے بارِ امانت فرشتو اٹھے یہ تو ممکن نہیں یہ تو ممکن نہیں

اس امانت کی خاطر بنامِ امیں آدمی چاہیے آدمی چاہیے

حاصلِ زندگی ہو اطاعت تیری ماسوا اس کے ساری تمنا غلط

فکرِ دنیا غلط فکرِ عقبیٰ غلط، فکرِ امروز کیا فکرِ فردا غلط

سر تری بارگاہ میں خمیدہ رہے در بدر اپنے سر کو جھکانا غلط

بخت کی گردشیں وقت کی بے رخی حادثاتِ دو عالم کا کھٹکا غلط

مشکلیں خود ہی آسان ہو جائیں گی دل میں ایمان کی روشنی چاہیے

وہ سوال آلست جواب بلا بن گیا عین تخلیق کا مدعا

حکم سجدہ ملائک کو دے کر وہیں رتبۂ نوع انساں کو اعلیٰ کیا

انتہائے کرم ہے کرم نے تیرے اس قدر کچھ بڑھایا میرا حوصلہ

تیری رحمت کے صدقے بروز ہا دل میں نے بے ساختہ بڑھ کے دی یہ دعا

عشق تیرا محبت نبی کی ترے، لا مجھے دے مجھے دے یہی چاہیے

شیخ اور برہمن کی ان باتوں میں آ ان کی باتوں میں بھٹکا کیے عمر بھر

ایک مقصود ہیں راستے ہیں الگ اک کہے آ ادھر اک کہے چل ادھر

اونچ اور نیچ کے فرق میں کس قدر گھر گیا ہے خدا کی قسم یہ بشر

یک جہتی کا پیغام قیصرؔ کہاں ان کے پیشِ نظر بات ہے مختصر

دشمنی دوستی میں بدل جائے بس زندہ رہنے کی خاطر یہی چاہیے