خبر لو گردش قسمت کا مارا ہوں میرے خواجہ

خبر لو گردش قسمت کا مارا ہوں میرے خواجہ

سہارا دو مجھے میں بے سہارا ہوں میرے خواجہ

سنوارو دستِ رحمت سے نوازو چشمِ الفت سے

میں اپنے وقت کا بگڑا ستارا ہوں میرے خواجہ

ہزاروں سائلوں نے جن کے در سے جھولیاں بھریں

میں آکر آج اس در پر پکارا ہوں میرے خواجہ

مصائب جھیلتے تنگ آگیا گھبرا گیا ہوں میں

سنبھا لو گردشِ دوراں کا مار ہوں میرے خواجہ

جسے پڑھ کر زمانہ آنسوؤں میں ڈوب جائے گا

حدیثِ درد کا میں وہ سی پارہ ہوں میرے خواجہ

کنارہ جس کے سائے کو قریب آنے نہیں دیتا

میں موجِ غم کا وہ بد بخت دھارا ہوں میرے خواجہ

زبوں حالی پہ میری بیکسی تک خون روتی ہے

میں وقت اور بخت ان دونوں کا مارا ہوں میرے خواجہ

نہ دو گر بھیک ٹھکرا دو کہ قصہ پاک ہو جائے

تمہارے روضہ پہ دامن پسارا ہوں میرے خواجہ

دلِ قیصرؔ کی ہر دھڑکن سے یہ آواز آتی ہے

تمہارا ہوں میرے خواجہ تمہارا ہوں میرے خواجہ