چلا ہوں میں سوئے مدینہ چلا ہوں میرے عزم کو کامرانی ملے گی

چلا ہوں میں سوئے مدینہ چلا ہوں میرے عزم کو کامرانی ملے گی

پہونچ کر درِ مصطفیٰ پر پہونچ کر یقیناً نئی زندگانی ملے گی

مقدر کے یاروں کو پیغام دے دو زمانے کو ایک دعوت عام دے دو

چلو میرے آقا کے روضے پہ چل کر ملے گی خوشی جاودانی ملے گی

طفیلِ محمد جو مانگو گے ملے گا بفضلِ خدا غنچۂ دل کھلے گا

فقیروں کو شاہنشاہی بخش دیں گے غلاموں کو پھر حکمرانی ملے گی

کہاں تک رہے گی میری خستہ حالی کبھی تو سنیں گے غیروں کے والی

تصور میں کہتا ہے بخت بلالی خوشی وہ ہے جو ناگہانی ملے گی

ہے پر کیف دلکش مدینے کا منظر مدینہ ہے رتبے میں جنت سے بڑھ کر

مسرت میں ڈوبی ہے شام مدینہ تو صبح مدینہ سہانی ملے گی

مسلمان ہوں میرا ایمان ہے یہ غلامِ محمد کی پہچان ہے یہ

میرے بعد بھی دیکھ لینا عزیزوں ہر ایک لب پہ میری کہانی ملے گی

نبی کی محبت ہو جس کو میسر مبارک اسے شغلِ نعت پیمبر

ہے دعویٰ میرا اس کے شعروں میں قیصرؔ تسلسل ملے گا روانی ملے گی