رت بدل دیتا ہے ادنیٰ سا اشارا تیرا

رت بدل دیتا ہے ادنیٰ سا اشارا تیرا

تیرے بندوں کو ہے معبود سہارا تیرا

تو نے بخشا ہے جسے دیدۂ بینا یارب !

ذرے ذرے میں وہ کرتا ہے نظارا تیرا

سرجھکاتا ہے ادب سے جو تری چوکھٹ پر

اس کے ماتھے پہ چمکتا ہے ستارا تیرا

کیسے برباد کرے گا کوئی بندوں کو ترے

کیسے بگڑے گا زمانے میں سنوارا تیرا

تیری مٹھی میں ہے تقدیر دو عالم یارب

ہے زمانے کی ہر اک شئے پہ اجارا تیرا

تو نے قیصرؔ کا بھرم رکھا ہے ، اے میرےخدا

اس نے جب نام مصیبت میں پکارا تیرا