اس جانِ عرب کا کیا کہنا، اس شان عجم کا کیا کہنا

اس جانِ عرب کا کیا کہنا، اس شان عجم کا کیا کہنا

رحمت کی ادا کا کیا کہنا، اندازِ کرم کا کیا کہنا

سرکار کی چوکھٹ سے جو ملے ، وہ لذتِ درد مبارک ہے

ہو جس کا تعلق آقا سے ، اس پیارے کے غم کا کیا کہنا

جو دونوں جہاں کا سرور ہے ، جو اپنے خدا کا دلبر ہے

جو شافعِ روزِ محشر ہے ، اُس شاہِ اُمم کا کیا کہنا

روشن ہے جو عرشِ اعظم پر ، احسان ہے جس کا عالم پر

چمکا جو جبینِ آدمؑ پر ،اُس نورِ حرم کا کیا کہنا

ہر لفظ ہے ارشاداتِ نبی ، کرتا ہے بیاں حالاتِ نبی

لکھتا ہے ہمیشہ نعتِ نبی ، قیصرؔ کے قلم کا کیا کہنا