ہے سب سے اونچا مقام اُن کا، درود پڑھئے، سلام کہئے

ہے سب سے اونچا مقام اُن کا، درود پڑھئے، سلام کہئے

زباں پہ جب آئے نام اُن کا، درود پڑھئے، سلام کہئے

شہِ مدینہ نے جو کہا ہے ، خدا کی باتوں کا آئینہ ہے

کلامِ حق ہے کلام اُن کا، درود پڑھئے، سلام کہئے

وہ بے نواؤں کے ہمنوا ہیں، وہ بے سہاروں کے آسرا ہیں

بھلائی سب کی ہے کام اُن کا، درود پڑھئے، سلام کہئے

وہ مظہرِ شانِ کبریا ہیں، وہ مخزنِ گوہرِ عطا ہیں

لقب ہے خیر الانام اُن کا درود پڑھئے، سلام کہئے

شفیقِ روزِ جزا وہی ہیں ، محبتوں کی ضیا وہی ہیں

ہے آدمیت پیام ان کا ، درود پڑھئے ، سلام کہئے

وہ ہے جو قانونِ کبریائی، وہی ہے دستور مصطفائی

نظامِ برحق نظام ان کا ، درود پڑھئے ، سلام کہئے

برائے سوزِ حیات قیصرؔ ، رسولِ اکرم کی نعت قیصرؔ

سنا رہا ہے غلام ان کا ، درود پڑھئے ، سلام کہئے