وہ زمیں کیا ہے ؟ یہ پوچھو رفعتِ افلاک سے

وہ زمیں کیا ہے ؟ یہ پوچھو رفعتِ افلاک سے

آسماں پیدا ہوا ہے جس کی خاکِ پاک سے

جس زمیں پر بن گیا سرکار کا نقشِ قدم

آئینہ شرمندہ ہے اُس سرزمیں کی خاک سے

ہے یہی اک آرزو یا سیدِ عالی مقام

آپ کی چوکھٹ کو چوموں دیدۂ نمناک سے

مل گیا پاکیزگیِ عشق کا اس کو پتہ

دل کا سودا کر لیا جس نے شہِ لولاک سے

کیا کرے گا لے کے وہ قیصرؔ گلِ باغِ جناں

جس کو نسبت ہے مدینے کے خس و خاشاک سے

ہاتھ سے موقع نہ جانے پائے عرضِ حال کا

کام لے اے عشق تو بھی جذبۂ بیباک سے

نبضِ فطرت پر اگر ہوتی ہیں قیصرؔ انگلیاں

خود بخود شاخیں نکل پڑتی ہیں پھر مسواک سے