گھِر کی تاریکیوں میں نگاہِ بشر جب لگی چیخنے روشنی روشنی

گھِر کی تاریکیوں میں نگاہِ بشر جب لگی چیخنے روشنی روشنی

آمنہ بی کے گھر چاند روشن ہوا ساری دنیا ہوئی چاندنی چاندنی

لائے تشریف دنیا میں جب مصطفیٰ مسکرانے لگی رحمتِ کبریا!

آدمیت نے دامن پکڑ کر کہا اب بچا لیجئے یا نبی یا نبی

جامِ توحید کے دور چلنے لگے نور ہی نور ساغر میں ڈھلنے لگے

سجدے پیشانیوں میں مچلنے لگے رقص کرنے لگی بندگی بندگی

رحمتوں برکتوں کا اشارا ملا موجِ طوفانِ غم میں کنارا ملا

کملی والے کا جب سے سہارا ملا واقعی ہوگئی زندگی زندگی

جو محمد کی باتیں سمجھتے نہ تھے اور واقف نہ تھے دینِ اسلام سے

جب وہ ایمان لائے تو کہنے لگے ہوگئی دور اب تیرگی تیرگی

حشر میں آئیں گے جب حبیبِ خدا شاد ہوجائے گی رحمتِ کبریا

سب پیمبر کہیں گے یہی برملا بخشوا لیجئے یا نبی یا نبی!

آپ کیا اور کیا آپ کے ولولے لوگ واقف ہیں قیصرؔ میاں آپ سے

آپ نعت نبی جب سے لکھنے لگے ہوگئی آپ کی شاعری شاعری