مقام اس کا فرازِ آسماں تھا

مقام اس کا فرازِ آسماں تھا

کہ خسرو خسرو اہلِ بیاں تھا

کبھی انگلی ستارِ جاں فزا پر

کبھی شعر و سخن کا رازداں تھا

کبھی تھا سوزِ سارنگی سے مسحور

کبھی ڈھولک پہ ہاتھ اس کا رواں تھا

پکھاوج سے کبھی کرتا تھا باتیں

کبھی شہنائی سے نغمہ فشاں تھا

کبھی تھا رقص کی محفل میں موجود

کبھی نور دل روحانیاں تھا

عجب تھی قوتِ ایجاد اس کی

ہر اک فن میں وہ یکتائے زماں تھا

جہاں سجدے کیے اس کی جبیں نے

نظام الدین کا وہ آستاں تھا

اب اس سے بڑھ کے کیا تعریف ہوگی

کہ سعدی سا سخنور قدرداں تھا

زبان ہندوی اس نے سنواری

وہ اک ایسا عظیم اہلِ زباں تھا

جو گوری سوئی مکھ پر کیس ڈالے

ہوا تاریک خسرو کا جہاں تھا

فراقِ پیر میں دم اس نے توڑا

وہی لمحہ وصال جاوداں تھا

عدیم المثل تھی تاریخ وصلش

جہاں میں اس کا ثانی ہی کہاں تھا

نہ کیوں اس کو کہیں ہم طوطیٔ ہند

وہ پہلا شاعرِ اردو زباں تھا