چراغِ انجمنِ اؤلیا غریب نواز

چراغِ انجمنِ اؤلیا غریب نواز

امین سطوتِ خیبر کشا غریب نواز

مدد کو رحمتِ پروردگار آتی ہے

پکارتا ہے اگر کوئی یا غریب نواز

گل حدیقۂ حسنین نور چشم علی

فدائے سیرت خیرالوریٰ غریب نواز

ہزار شورشِ طوفاں ہو مجھ کو غم کیا ہے

مرے سفینے کے ہیں ناخدا غریب نواز

وہیں سے کھینچ لیا دامنِ کرم نے ترے

غریب نے جو پکارا کہ یا غریب نواز

سجود عشق کی لذت سے آشنا جو ہوا

وہ سر نہ آپ کے در سے اٹھا غریب نواز

خدا کرے وہی نظریں ہوں آپ کے جلوے

یہی دعا ہے یہی مدعا غریب نواز

ہماری سمت بھی للہ اک نگاہ کرم

تڑپ رہا ہے دل مبتلا غریب نواز

برائے خواجۂ عثماں ہو اک نظر آتا

سوئے غریب محبت نما غریب نواز

قمرؔ وہ جام ملا ہے کہ جوش مستی میں

تمام عمر پکاروں گا یا غریب نواز