کرم کی نظر ہو اگر غوث اعظم

کرم کی نظر ہو اگر غوث اعظم

تو شاداں رہوں عمر بھر غوث اعظم

کوئی نیّرِ دین کہتا ہے تم کو

کوئی کہہ رہا ہے قمر غوث اعظم

مرے صبر اور ضبط کی انتہا ہے

ذرا جلد لیجئے خبر غوث اعظم

تمہاری عنایت کا بھوکا ہوں شاہا

یہ کاسہ مرا دیجے بھر غوث اعظم

مصیبت زدہ ہوں بلا میں پھنسا ہوں

بتاؤ کہ جاؤں کدھر غوث اعظم

ترے آستانہ پہ سر رکھ کے کہدوں

پھرے کون اب دربدر غوث اعظم

ستم ہے مصیبت کا مارا ہوا ہوں

نہیں ہے کوئی چارہ گر غوث اعظم

خود آکر مری حالتِ زار دیکھو

فلک بھی ہے بیداد پر غوث اعظم

مصیبت میں آفت میں غربت میں قاتلؔ

نہیں کوئی حامی مگر غوث اعظم