حبیبِ رحماں نبیٔ ذیشاں درود تم پر سلام تم پر

حبیبِ رحماں نبیٔ ذیشاں درود تم پر سلام تم پر

عجم کے والی عرب کے سلطاں درود تم پر سلام تم پر

حسابِ محشر کی شامتوں سے عذابِ دوزخ کی آفتوں سے

تمہیں تو امت کے ہو نگہباں درود تم پر سلام تم پر

کہیں ہو احمد کہیں محمد عجیب محمود نام پایا

نہ کیوں ہم اس نام پر ہوں قرباں درود تم پر سلام تم پر

تمہارا دشمن خدا کا دشمن تمہارا پیارا خدا کا پیارا

تمہاری الفت ہے عینِ ایماں درود تم پر سلام تم پر

کہوں گا سو بار میں یہی ہاں نہیں مسلماں نہیں مسلماں

جو دل سے تم پر نہ لائے ایماں درود تم پر سلام تم پر

اگر چہ حسن و جمال بے حد جہاں میں یوسف کو حق نے بخشا

مگر ہو تم رشکِ ماہِ کنعاں درود تم پر سلام تم پر

تمہارے روضہ کی سبز کیاری فضا ہے جس کی خدا کو پیاری

نہ کیونکہ ہو رشک باغِ رضواں درود تم پر سلام تم پر

غریقِ دریائے معصیت ہوں جو مصلحت جانیے وہ کیجیے

پکڑ لیا ہے تمہارا داماں درود تم پر سلام تم پر

میں گو نہیں ہوں وہاں کے لائق کسی طرح تو بلا ہی لیجے

جو مجھ کو مشکل وہ تم کو آساں درود تم پر سلام تم پر

تمہارے در کے سوائے اصلا نہیں جمالیؔ کی کچھ تمنا

رہے یہ کب تک اسیرِ ہجراں درود تم پر سلام تم پر