یا خواجہ معین الملت و دیں، سلطان الہند غریب نواز

یا خواجہ معین الملت و دیں، سلطان الہند غریب نواز

ایوانِ چشت کے رکن رکیں، سلطان الہند غریب نواز

تم حضرتِ حق کے پیارے ہو خواجہ عثماں کے دلارے ہو

مقبولِ جنابِ رسول امیں، سلطان الہند غریب نواز

جب سے کہ یہاں رکھا ہے قدم ہوئے شاہ و گدا تسلیم کو خم

تم ہند کے مالکِ تاج و نگیں، سلطان الہند غریب نواز

ہے قند و بنات سے شیریں تر عشاق کے حق میں آبِ خضر

لنگر کا تمہارے آش جو بن، سلطان الہند غریب نواز

ہے جھالر چشمۂ آبِ بقا، لنگر ہے مفرح ہوش فزا

روضہ ہے کہ روضۂ خلد بریں، سلطان الہند غریب نواز

اک آن میں کوہ کو کاہ کرے، اک دم میں گدا کو شاہ کرے

ترے در کا گدائے خاک نشیں، سلطان الہند غریب نواز

جو تیرے حضور میں آتے ہیں، سب اپنی مرادیں پاتے ہیں

کیا لطف کے قابل میں ہی نہیں، سلطان الہند غریب نواز

نیکوں کے سبب سے بدوں کو جہاں بخشے گا خدائے کون و مکاں

وہاں مجھ کو نہ جانا بھول کہیں، سلطان الہند غریب نواز

اسی غم میں جمالیؔ حیراں ہے، از بس ناشاد و پریشاں ہے

کہ نہیں کچھ توشۂ روزِ پسیں، سلطان الہند غریب نواز