آشیاں جل گیا گلستاں لٹ گیا ہم قفس سے نکل کر کدھر جائیں گے

آشیاں جل گیا گلستاں لٹ گیا ہم قفس سے نکل کر کدھر جائیں گے

اتنے مانوس صیاد سے ہوگئے اب رہائی ملے گی تو مر جائیں گے

اور کچھ دن یہ دستور میخانہ ہے تشنہ کامی کے یہ دن گزر جائیں گے

میرے ساقی کو نظریں اٹھانے تو دو جتنے خالی ہیں سب جام بھر جائیں گے

اے نسیم سحر تجھ کو ان کی قسم ان سے جا کر نہ کہنا مرا حالِ غم

اپنے مٹنے کا غم تو نہیں ہے مگر ڈر یہ ہے ان کے گیسو بکھر جائیں گے

اشک غم لےکے آخر کہاں جائیں ہم آنسوؤں کی یہاں کوئی قیمت نہیں

آپ ہی اپنا دامن بڑھا دیجیے ورنہ موتی زمیں پر بکھر جائیں گے

کالے کالے و ہ گیسو شکن در شکن وہ تبسم کا عالم چمن در چمن

کھینچ لی ان کی تصویر دل نے مرے اب وہ دامن بچا کر کدھر جائیں گے

اور کچھ دن فریب بہاراں رہے یہ نہ کہیے چمن میں خزاں آگئی

رنگ معصوم کلیوں کا اڑ جائے گا اور پھولوں کے چہرے اتر جائیں گے

جانے کس کی طرف سے یہ پیغام نو اہل گلشن کو باد صبا دے گئی

جس قدر غنچہ و گل سے کھیلو گے تم راستے اور کانٹوں سے بھر جائیں گے

اور اتنا کرم مالک دوجہاں ان کی قسمت کا غم بھی مجھے بخش دے

آج برباد کرکے مری زندگی کل یہ طوفان غم ان کے گھر جائیں گے

موت آواز دیتی ہے شاید انہیں جانے والے ہیں دنیا سے اہلِ وفا

رازؔ ایسے میں کوئی غزل چھیڑ دو قافلے زندگی کے ٹھہر جائیں گے