ٹوٹے ہوئے دلوں کا سہارا حسین ہے

ٹوٹے ہوئے دلوں کا سہارا حسین ہے

ڈوبے نہ جو فلک پہ وہ تارا حسین ہے

اہل خرد سمجھ نہ سکے کیا حسین ہے

نانا کے جسم پاک کا سایہ حسین ہے

ایمان اور کفر میں نسبت نہیں کوئی

دنیا ہے رات اور سویرا حسین ہے

ہو کر شہید زندگی جاوداں ملی

زندہ تھا اور آج بھی زندہ حسین ہے

جنت کا پھول سید کونین کے لیے

اور فاطمہ کی آنکھ کا تارا حسین ہے

یہ بھی تمہیں خیال نہ آیا یزید یو!

سرکار دو جہاں کا نواسہ حسین ہے

بزم رسول پاک میں دیکھا ہے رازؔ نے

سرکار ہیں چراغ اجالا حسین ہے