دامن ضبط ہاتھوں سے چھٹنے لگا یہ محبت میں کیسا مقام آگیا

دامن ضبط ہاتھوں سے چھٹنے لگا یہ محبت میں کیسا مقام آگیا

اے غمِ عشق کوئی سزا دے مجھے میرے ہونٹوں پہ پھر ان کا نام آگیا

آج پھر ان کو مجبور ہونا پڑا آج پھر جذبۂ عشق کام آگیا

ختم ہونے کو تھا زندگی کا سفر وہ تو کہیے کہ ان کا پیام آگیا

رنگ لا کر رہی میری تشنہ لبی بھول بیٹھے ہیں ساقی بھی ساقی گری

خود بخود جام سے مئے چھلکنے لگی میکدے میں اگر میرا نام آگیا

آرزؤں کا دامن بھی پُرنم رہا رات بھر کچھ عجب اپنا عالم رہا

جب ذرا تیز اس دل کی دھڑکن ہوئی میں یہ سمجھا کہ ان کا پیام آگیا

برق گرتی رہے یا جلے آشیاں ان کو سیر گلستاں سے فرصت کہاں

خود نہ آئے کبھی حال غم پوچھنے یا پیام آگیا یا سلام آگیا

دیر و کعبہ کی دنیا سے نا آشنا میں ادا کر رہا تھا نمازِ وفا

لطف سجدہ اسی وقت گم ہو گیا جب شعور سجود و قیام آگیا

چونک اٹھے جس سے دنیا وہ آواز ہوں میں شرابی نہیں میکدہ ساز ہوں

میں نہیں تھا تو ویران تھا میکدہ میرے آتے ہی گردش میں جام آگیا