رب_قادر مقتدر کی قدرتیں ان کو نصیب

رب قادر مقتدر کی قدرتیں ان کو نصیب

جا نشینی نبی کی شوکتیں ان کو نصیب

عین رب پاک ہیں وہ وجہ رب ذو الجلال

جلوهٔ رب جلی کی خلوتیں ان کو نصیب

نور ذات مصطفیٰؐ وہ نور حق کا عکس کل

یعنی بزم نور کی سب جلوتیں ان کو نصیب

پیشوائے ہر دو عالم راہ حق کا وہ چراغ

حاکم ارض و فلک کل حشمتیں ان کو نصیب

ہاں نبی کی ہمسری تنہا انہیں کو ہے ملی

یعنی تمثیل نبی کی ندرتیں ان کو نصیب

یہ قصیدہ جن کا ہے صفدر ہیں وہ حیدر ہیں وہ

نام نامی ہے علی سب رفعتیں ان کو نصیب

دشمنان مرتضیٰ تو خوار ہیں ہوں گے ذلیل

ٹھوکریں ان کا مقدر ذلتیں ان کو نصیب

مدحتِ حیدر میں جو رہتے ہیں صبح و شام گم

فتح و نصرت ان کی ہے سب عزتیں ان کو نصیب

چین سے سوئیں گے وہ تو قبر میں اپنی اثرؔ

جو علی کے ہو گئے ہیں راحتیں ان کو نصیب