میں با ادب کھڑا ہوں دربارِ مصطفیٰ میں

میں با ادب کھڑا ہوں دربارِ مصطفیٰ میں

بگڑی بنا رہا ہوں دربارِ مصطفیٰ میں

جود و سخا کا قلزم دربارِ مصطفیٰ میں

میں سن کے آ گیا ہوں دربار مصطفیٰ میں

کرنیں نکل رہیں ہیں دربار مصطفیٰ میں

میں بھی چمک اٹھا ہوں دربارِ مصطفیٰ میں

میرا وجود جیسے تحلیل ہو گیا ہے

میں خود کو ڈھونڈتا ہوں دربار مصطفیٰ میں

آنسو ندامتوں کے آنکھوں سے بہہ رہے ہیں

صد شکر رو رہا ہوں دربارِ مصطفیٰ میں

چھم چھم برس رہی ہے برسات رحمتوں کی

جس سمت دیکھتا ہوں دربارِ مصطفیٰ میں

خورشید بن کر لوٹے بے نور تھے جو تارے

جن جن سے میں ملا ہوں دربارِ مصطفیٰ میں

ہاں رحمتِ دو عالم سایہ فگن ہے سب پر

دیکھو میں جھومتا ہوں دربارِ مصطفیٰ میں

یہ خواب دیکھتا ہوں ہر رات ہی مغلؔ میں

نعتیں سنا رہا ہوں دربارِ مصطفیٰ میں