ہر ایک شے سے الگ شے ہے آرزو تیری

ہر ایک شے سے الگ شے ہے آرزو تیری

کہ مہر و ماہ کو ہر پل ہے جستجو تیری

ترے اثر سے نکل کر کوئی کہاں جائے

کہ کائنات میں خوشبو ہے چار سو تیری

ترا کرم کہ بہار آشنا ہی رہتی ہے

ہمارے واسطے دنیائے رنگ و بو تیری

مری زبان کو دے تو جو حوصلہ تو زباں

تمام عمر کرے صرف گفتگو تیری

متاعِ زیست تری آرزو کو سمجھا تھا

سو کام آئی ہمیشہ ہی آرزو تیری

جہاں میں کوئی نہیں تیری لطف سے خالی

ہر ایک رخ سے کرم آشنا ہے خو تیری

اب اور کیا کسی دولت کی وہ کرے خواہش

نصیب ہے دلِ خاور کو آرزو تیری