روشن ہے جس سے زیست کی یہ انجمن تمام

روشن ہے جس سے زیست کی یہ انجمن تمام

اس نورِ آگہی پہ فدا جان و تن تمام

توصیفِ مصطفیٰ کے لیے لفظ اب کہاں

اس ذاتِ پاک پر ہوئے سارے سخن تمام

امڈا حرا کے خار سے وہ سیلِ رنگ و بو

گلزارِ خلد بن گیے دشت و دمن تمام

میں اور میری کج کلہی دونوں کچھ نہیں

نسبت سے آپ کی ہے مرا بانکپن تمام

وہ عشقِ مصطفیٰ کو ذرا آزمائیں تو

جو کر چکے ہیں اپنے دکھوں کو جتن تمام

آئی ہے اس طرف جو مدینے سے کچھ ہوا

خوشبو میں بس گئی ہے فضائے وطن تمام

خاورؔ نہ پوچھ وصف مرے کملی پوش کا

ہر رنگ ہر لباس میں گل پیرہن تمام