کیا نبی اور کیا نبوت کی معلیٰ شان ہے

کیا نبی اور کیا نبوت کی معلیٰ شان ہے

جس کی صورت سے ہویدا سورۂ رحمٰن ہے

ذات جن کی دو جہاں میں منبع احسان ہے

مدح میں ان کے مقصر طاقت انسان ہے

یا رسول اللہ تم پر جان و دل قربان ہے

یاد تیری دل میں میرے ہر گھڑی ہر آن ہے

رحمت اللعالمیں ہو یا نبی خیر الوریٰ

شاہد صادق تمہارے وصف کا قول خدا

ہو شفیع المذنبیں و ہادی راہ ہدیٰ

کر کرم راہ سعادت پر مجھے ہو رہنما

یا رسول اللہ تم پر جان و دل قربان ہے

سورۂ و الشمس ہے تجھ حسن عارض پر گواہ

زلف مشکیں تس پہ جوں واللیل ہے بے اشتہا

آیۂ انا فتحنا فتح میں ہے شمع راہ

قاتل حساد دیں تم ہو اور تیغ لا الہ

یا رسول اللہ تم پر جان و دل قربان ہے

میں تمہارے نور کے اک ذرہ ماہ و آفتاب

بہر ور تجھ خوان بخشش سے ہیں دریا اور سحاب

رحم کر مجھ حال اوپر یا اخی بوالتراب

یا رسول اللہ تم پر جان و دل قربان ہے