تعالیٰ اللہ کیا شانِ جمالِ مصطفائی ہے

تعالیٰ اللہ کیا شانِ جمالِ مصطفائی ہے

کہ صورت آپ کی خود خالقِ یکتا کو بھائی ہے

گنہ گارانِ عالم پر گھٹا رحمت کی چھائی ہے

نویدِ بخششِ امت صبا طیبہ سے لائی ہے

تمہارے عشق میں رہنا ہی زہد و پارسائی ہے

مرا ایماں تمہارے آستانہ کی گدائی ہے

میں قرباں یا رسول اللہ تمہاری چشمِ رحمت کے

اشارہ میں اسیرِ قیدِ عصیاں کی رہائی ہے

مرا دل ہی نہیں اس در پہ مست سجدۂ الفت

فرشتوں کی عقیدت میں وہاں پر جبہ سائی ہے

ستارے رقص میں ہیں ماہِ تاباں مسکراتا ہے

شبِ میلاد کیسی دھوم سے دنیا میں آئی ہے

بھٹک سکتا نہیں راہِ حقیقت سے کوئی رہرو

کہ رہبر آپ کے اصحابِ دیں کی رہنمائی ہے

رسائی بارگاہِ غوثِ اعظم تک ہوئی میری

رجبؔ مرشد کے صدقے میں مری بگڑی بن آئی ہے