اعجاز لطف خاص تری ہر نظر میں ہے

اعجاز لطف خاص تری ہر نظر میں ہے

اکسیر کا کمال تری خاک در میں ہے

تیرے ہی نور سے تو منور ہے زندگی

تیری ہی یاد خانۂ قلب و جگر میں ہے

کھنچ کھنچ کے آ رہا ہے زمانہ ترے حضور

دیکھو تو کس بلا کی کشش بام و در میں ہے

منزل کی سمت بڑھتے ہیں اب خود بخود قدم

کب یہ کمال اور کسی راہبر میں ہے

دنیائے آرزو تو فریب نگاہ تھی

جو کیف دائمی ہے تری رہ گزر میں ہے

دل میں سما رہا ہے ترا نورِ باطنی!

یہ بات کب تجلی شمس و قمر میں ہے

مجھ کو ہےتیری ذات سے اک ربط مستقل

وہ سلسلہ جو دامنِ شام و سحر میں ہے

اے اوؔج شوقِ دید کا عالم نہ پوچھیے

بس ان کو دیکھتے رہیں سودا یہ سر میں ہے