تم وہ ہو حق نے بنایا جن کو شاہِ انبیا

تم وہ ہو حق نے بنایا جن کو شاہِ انبیا

تم وہ ہو بالا ہے سب نبیوں میں جن کا مرتبہ

تم وہ ہو جن کو شرف معراج کا حاصل ہوا

تم وہ ہو عرش بریں زینہ ہے جن کے بام کا

نیر برج شرف ہو آسمانِ معرفت

منکشف تم سے ہوا رازِ نہانِ معرفت

تم وہ وہ جن کے سبب تو قیر ہے اسلام کی

جلوہ شانِ احد تصویر ہے اسلام کی!

ہر طرف پھیلی ہوئی تنویر ہے اسلام کی

تم سے ہی چمکی ہوئی تقدیر ہے اسلام کی

تم نے احکامِ شریعت کا دکھا کر آئینہ

ہر دل تاریک میں اک نور پیدا کر دیا

ہادیٔ دین متیں ہو تم محمد مصطفیٰ

باعثِ صد فخر و ملت رہنما و پیشوا

لکھ دیا حق میں تمہارے حق نے لولاک لما

تم نہ ہوتے تو نہ بنتے یہ کبھی ارض و سما

تم سے قائم ہے جہاں میں یہ جہانِ بیکراں

اس سے پہلے نام کو بھی کچھ نہ تھا نام و نشاں

تم وہ ہو چرخِ رسالت کے درخشاں آفتاب

نورِ عالم تاب کا جس کے نہیں کوئی جواب

دیکھ کر بزم جہاں میں رنگِ حسنِ انتخاب

شرم سے خورشیدِ محشر ہے لیے منہ پہ نقاب

تم وہ ہو ظلمت مٹا دی دم میں کفر و شرک کی

مشعلِ توحید کی سب کو دکھا کر روشنی

حق تو یہ ہے حق پرستی کا بتا کر راستہ

کر دیا باطل پرستانِ جہاں کو حق نما

ذاتِ اقدس ہے تمہاری مظہر صدق و صفا

بن گئے ناآشنا بھی رازِ وحدت آشنا

تھا وجود پاک تلقینِ ریاضت کے لیے

تم یہاں آئے تھے امت کی شفاعت کے لیے

ہو سکے وصفِ حمیدہ کا تمہارے کیا بیاں

کھل نہیں سکتی پئے توصیف رونقؔ کی زباں