تو ہے محبوبِ خدا چاہنے والا تیرا

تو ہے محبوبِ خدا چاہنے والا تیرا

مرتبہ سارے رسولوں میں ہے بالا تیرا

کلمۂ صل علیٰ وردِ زباں رکھتا ہوں

خواب میں دیکھ لیا ہے قدِ بالا تیرا

ہجر میں دل کے تڑپنے کے نئے ہیں انداز

عشق ہے مجھ کو زمانے سے نرالا تیرا

عفو ہو جائیں محشر میں خطائیں ساری

داورِ حشر کو دوں گا میں حوالا تیرا

آہ کر! ہجر محمد میں سنبھل کر اے دل

عرش کے پار نکل جائے گا نالا تیرا

لے اڑی آج صبا سوئے مدینہ دل زار

ناتوانی نے بڑا کام نکالا تیرا

نور سے تیرے منور ہوئے دونوں عالم

نظر آتا ہے ہر اک سمت اجالا تیرا

اس قدر ہند میں گھبرائی ہے فوجِ عشاق

بھاگا آتا ہے مدینے کو رسالا تیرا

گرمیٔ شوقِ مدینہ سے تو ہاں بسم اللہ

جانِ بیتاب ہوا دیس نکالا تیرا

لے خبر جلد مری ناز سے سونے والے

ہو گیا فرشِ زمیں چاہنے والا تیرا

ہو گیا شوق میں وہ آج نثارِ احمد

دل جو رونقؔ تھا بڑے نازوں کا پالا تیرا