عالمِ شعر و ادب میں یوں تو ہے

عالمِ شعر و ادب میں یوں تو ہے

ہر کسی کا اپنا رنگ اپنا مقام

اپنا انداز، اپنا ڈھب، اپنی ادا

اپنا فن، اپنا سخن، اپنا کلام

ہاں! مگر ان کا کوئی ثانی نہیں

یاد رکھے جائیں گے دو چار نام

میر آتش غالب و خسرو، ولی

آیتِ تسخیر تھا جن کا کلام

ان میں بھی جو مرتبہ خسرو کا ہے

برتری میں وہ رہے گا لاجواب

یوں درخشندہ رہے گا حشر تک

جس طرح تاروں کی صف میں ماہتاب

در فصاحت، در بلاغت در بیاں

بزم فِکر و فن پہ ہے چھایا ہوا

آج تک، صدیاں گذر جانے پہ بھی

مستند ہے اس کا فرمایا ہوا

لاکھ پنپے وسعتِ عِلم و ادب

لاکھ ہو کوئی سلاست کا امیں

جو کہا اس نے زبانِ عام میں

اس کی عظمت کا بدل ممکن نہیں

عرش پیما اس کی فکر نکتہ رس

حسنِ معنی خوش بیانی سے عیاں

عامیانہ طرزِ نو، اسلوبِ نو

نقشِ صوری تر زبانی میں نہاں

ٹھمریوں، پٹوں، دو سخنوں کا دھنی

ابتداً خسرو سلطانی تھا وہ

شہرۂ نظم اس کا تھا ایران تک

ہند میں خاقانیٔ ثانی تھا وہ

اس کے فرموداتِ حق و آگہی

ہیں زباں زد آج بھی بہرِ سخن

تھا وہ نباض مزاجِ زندگی

اس کا چرچا انجمن در انجمن

خدمتِ علم و ادب کے ساتھ ساتھ

غرقِ عرفان و عبادت بھی رہا

وہ علم بردارِ آئینِ وفا

شاہدِ حق و حقیقت بھی رہا

اس کا مذہب مذہب انسانیت

آگہی اس کی حقیقت آشنا

اس کی تعلیم اتحاد و اشتراک

اک معلم بھی تھا وہ شاعر بھی تھا

سو صفات اک ذات میں مرکوز تھیں

دل کا بھی تھا، نام کا بھی تھا امیر

حاملِ سرمایۂ علم و ہنر

پھر بھی تھا وہ سو فقیروں کا فقیر

ایک رشتے میں پُرونے کے لیے

دلی و لاہور و ملتان و دکن

زندگی بھر وہ عمل پیرا رہا

بر بنائے ارتقائے علم و فن

گفتگوئے فکر و فن ہوگی جہاں

نام خسرو کا زباں پر آئے گا

باعثِ توقیر یادِ رفتگاں

نام یہ عہد آفریں کہلائے گا