جب ہوئے جوہ گر، مالکِ بحر و بر، خود قرینے میں سارا نظام آ گیا

جب ہوئے جوہ گر، مالکِ بحر و بر، خود قرینے میں سارا نظام آ گیا

فرش کو مرتبہ، اس قدر مل گیا آسماں کا زمیں کو سلام آ گیا

رحمتِ دو جہاں، فخرِ کون و مکاں، پیکرِ نور حسن تمام آ گیا

مہرِ پیغمبری، پشتِ اطہر پہ تھی سکۂ مصطفیٰ سب کے کام آ گیا

شرحِ روئے نبی سورۂ والضحیٰ اور والیل ہے شرحِ زلفِ دوتا

اُن کی تعریف میں اُن کی توصیف میں خالقِ دو جہاں کا کلام آ گیا

اللہ اللہ نامِ حبیبِ خدا کتنا شیریں ہے اور کس قدر جاں فزا

پھول سے کھل گیے، لب سے لب مل گیے جب زباں پر محمد کا نام آ گیا

آرزو ہے یہی اے شہِ دوسرا، کاش اس طرح جاؤں میں پیشِ خدا

دیکھ کر حشر میں مجھ کو سب یہ کہیں، وہ رسولِ خدا کا غلام آ گیا

نعتِ احمد ہے لب پر ترے دم بہ دم آج پڑتے نہیں ہیں زمیں پر قدم

اس قدر اے صباؔ شاد کیوں ہے بتا، کیا مدینے سے کوئی پیام آ گیا