عرش بر دوش پایانِ حسان ہے

عرش بر دوش پایانِ حسان ہے

خود ثنا بھی ثنا خوانِ حسان ہے

وقت مدحت نہ کیوں داد دیں جبرئیل

مدح خوانوں پہ فیضانِ حسان ہے

اپنے افکار پر خود نہ کیوں جھوم اٹھیں

ایک اک شعر وجدانِ حسان ہے

اور کوئی جانِ حسان ہو یا نہ ہو

نعت گوئی مگر جانِ حسان ہے

روح جبریل جھومے نہ کیوں نعت پر

وہ بھی شیدائے فرمانِ حسان ہے

نعت گوئی کا حق مجھ کو کیسے نہ ہو

میرے ہاتھوں میں دامانِ حسان ہے

کیوں نہ نعتیں پڑھوں دل سے میں اے صبیحؔ

دل نہیں میرا دیوانِ حسان ہے