یہ محفل پارساؤں میں بھی ایسے پارسا کی ہے

یہ محفل پارساؤں میں بھی ایسے پارسا کی ہے

کہ خاصانِ خدا کی، جانشینِ مصطفیٰ کی ہے

کہ جس کی شان میں نازل ہوئیں آیاتِ قرآنی

خدا ہی جانتا ہے شان کیا آلِ عبا کی ہے

جھکا رہتا ہے عالم ہر گھڑی لیں ان کے قدموں پر

خدا کی ذات میں جس نے بھی ہستی کو فنا کی ہے

محمد کے تصدق سے بہ لطفِ غوثِ صمدانی

مزار پیر محی الدین پر رحمت خدا کی ہے

بقا کیا چیز ہے بس ایک صیغہ ہے لطافت کا

خدا نے وصل کی سمجھو یہاں سے ابتدا کی ہے

انہیں کے دستِ قدرت میں رکھا زورِ یداللہ

کہ جس نے دوستی کی انتہا پر انتہا کی ہے

نہ چھوڑو تم نہ ہرگز بھول کر بھی ان کے دامن کو

بشارت ان کو لا خوف میرے رب العلا کی ہے

کہاں تک آنا جانا تیرا میرا اس طرح ہوگا

ابھی کب تک نہ جانے یہ گھڑی صبر و رضا کی ہے

بڑا بے خوف رہتا ہے سدا اشفاقؔ عالم میں

کہ اس کو رہنمائی بس تمہارے نقشِ پا کی ہے