بارگاہِ خسرو کون و مکاں تک آئے ہیں

بارگاہِ خسرو کون و مکاں تک آئے ہیں

ہم زمیں کے رہنے والے آسماں تک آئے ہیں

یہ مدینہ ہے یہاں آنکھیں بچھانا چاہیے

کچھ خبر بھی ہے کہ کس کے آستاں تک آئے ہیں

کر کے ہم آغاز نعت تاجدار انبیا

خوبی تقدیر سے حسن بیاں تک آئے ہیں

اپنی قسمت کی بلندی پر نہ کیوں نازاں ہوں ہم

لا مکاں تک جو گیا اس کے مکاں تک آئے ہیں

ہم تو بس معراج اس کو ہی سمجھتے ہیں سعیدؔ

اس سے آگے بڑھ نہیں سکتے جہاں تک آئے ہیں