مرحبا، خسروِ نوا گستر

مرحبا، خسروِ نوا گستر

طوطیٔ ہند، نغمہ سنجِ بہار

ذہنِ خلاق کا ہر ایک عمل

فکر و معنی کا قافلہ سالار

رزم میں بے عدیل ترک جری

بزم میں بے نظیر موسیقار

مصحفِ نظم، روکشِ گلشن

صفحۂ نثر، غیرتِ گل زار

اس کی ہر بیت اک شگوفہ زر

اس کا ہر شعر، اک دُرِ شہوار

ہر رباعی میں زندگی کے رموز

ہر پہیلی میں ذہن کے اسرار

غزل اس کی لطیف تر ایسی

جیسے پھولوں کی نرمیٔ رخسار

کافرِ عشق و صوفیٔ صافی

بندۂ حق پرست و سجدہ گزار

عارضِ فن پہ غازہ و تابش

چہرۂ زندگی پہ گرد و غبار

بزمِ حرف و سخن میں نغمہ سرا

عشقِ محبوبِ حق میں سینہ فگار

اہلِ ایراں کو اعتبار آیا

ایسا محکم زبان کا معیار

بند راحت کے راستے لیکن

منکشف دو جہاں کے اسرار

سر زمین وطن میں جذب ہوا

ایسا رکھتا تھا خاکِ ہند سے پیار

تجھ پر اربابِ فکر و فن کا سلام

قصر اردو کے اولیں معمار