ادب اے جہانِ حاضر یہ ہے بزم خسروانہ

ادب اے جہانِ حاضر یہ ہے بزم خسروانہ

ہے یہاں ازل ترنم، ہے ابد یہاں ترانہ

ہے ہر اک گدا کو حاصل غمِ عشق کا خزانہ

کہ رموزِ فقر سمجھے مرا خود غرضِ زمانہ

ترا نقش پا جہاں تھا ہے وہیں اک آستانہ

کہ اگل دیا زمیں نے کوئی گم شدہ خزانہ

کبھی آہ صبح ِگاہی کبھی نالۂ شبانہ

ہے وظیفہ مسلسل ترا سوزِ عاشقانہ

تری انگلیوں میں بربط تری جنبشوں میں نغمے

ترا ہر نفس ترنم، ترا ہر نفس ترانہ

نہ یہاں ہے کوئی ہندو، نہ یہاں کوئی مسلماں

کہ ہے کعبۂ محبت ترا سنگِ آستانہ

ہو مبارک آسماں کو یہ فروغِ ماہ و انجم

کہ ہے کہکشاں سے بڑھ کر تری خاکِ آستانہ

نہ ٹھہر سکا جبیں میں مری بندگی کا طوفاں

جو فضا میں جگمگایا ترا سنگِ آستانہ

ہیں کہیں اشوک و اکبر کہیں گاندھی و جواہر

کہ ہے عاشقوں کا معبد ترا سنگِ آستانہ

ترے آستاں کے ذرے مہ و مہر سے فزوں تر

ہے یہاں گدا کو حاصل تب و تابِ خسروانہ

بھڑک اٹھی اس کے دل میں بھی اک آرزوئے سجدہ

ترے آستاں پہ آیا تو ٹھہر گیا زمانہ