ہمیشہ دردِ محبت سے ہمکنار تھا تو

ہمیشہ دردِ محبت سے ہمکنار تھا تو

کچھ ایسا والہ و شیدائے حسنِ یار تھا تو

تجھے نوازا تھا حق نے ہر ایک نعمت سے

امیری میں بھی فقیری کا دعویدار تھا تو

سپاہی، صوفی و شاعر، ادیب اور نائک

کمالِ عشق میں یکتائے روزگار تھا تو

ہے تیری ذات پہ نازاں جو فنِ موسیقی

جہانِ علم و عمل کا بھی تاجدار تھا تو

تھا ایکتا ترا مقصد، ولیِ قوم تھا تو

وطن کے عشق میں کس درجہ بے قرار تھا تو

کسی کا دکھ ہو، ترے دل پہ تھا اثر اس کا

ہر اک ستم زدہ انساں کا غم گسار تھا تو

جہاں سے نام کبھی تیرا مٹ نہیں سکتا

گذشتہ اہلِ محبت کی یادگار تھا تو

ادا شناسِ محبت تھا دل ترا خسروؔ

جبھی تو واقفِ اسرارِ روزگار تھا تو

بیاں اب ترے اوصاف کیا کرے ساحرؔ

ہے مختصر یہ کہ قدرت کا شاہکار تھا تو