ہیں غوث وقت اور قطب زماں مخدوم سمنانی

ہیں غوث وقت اور قطب زماں مخدوم سمنانی

ہیں محبوب انیس بیکساں مخدوم سمنانی

ترا رتبہ ہوکیا مجھ سے بیاں مخدوم سمنانی

زمیں پہ تو ہے مثلِ آسماں مخدوم سمنانی

بفیض مرشد کامل جہاں گیری ملی ایسی

کہ تابع آپ کے ہیں انس و جاں مخدوم سمنانی

نگاہِ شاہ شرف الدین نے اشرف بنا ڈالا

یہ ہے خود آپ کا اپنا بیاں مخدوم سمنانی

کچھوچھہ کچھ نہیں تھا آپ کے دم سے بہت کچھ ہے

کہ اب تو فیض ہے ہر دم رواں مخدوم سمنانی

شفا نازل ہوا کرتی ہے جس جا تیری برکت سے

وہ روح آباد ہے جنت نشاں مخدوم سمنانی

وہ آبِ نیر ہویا خاک تیرے آستانے کی

یہ ہیں سب کے لئے اکسیرِ جاں مخدوم سمنانی

کرامت یہ بہت مشہور ہے کہ آگئی پل میں

دعا سے آپ کی مورت میں جاں مخدوم سمنانی

نگاہِ لطف کا ہے ملتجی یہ نادرؔ خستہ

ہر ایک غم سے ملے اس کو اماں مخدوم سمنانی